Shootings unter Covid-19.

Es ligged verrückti Wuchne hinter üs und sicher au nu es paar spezielli Wuche vor üs.  
Ich hoffes sehr, dass ier die Wuchne guet und gsund überstande hend und s Beschtä drus hend chönne mache. 

Mit de Lockerig vo de Massnahme wird au ich en Schritt zrugg in d Normalität wage und wieder starte mitem fotografiere vo Persone.  
Es isch mier bewusst, dass es die nächste Wuchne nu es paar Ischränkige wird gä, und ich garantiere üch, dass ich d Massnahme vom Bund sehr gnau wird ihalte. 

Es isch mir au ganz klar, dass für viel Lüüt es Shooting im Moment nid wichtig isch oder ier üch unwohl debii fühlid und ich ha natürlich Verständnis defür wenn ier bereits abgmachti Termine lieber in Summer oder in Herbst wend verschiebe.  
Babybüüch und ganz chliini Babys wartid jedoch nid und drum bi ich ab nächst Wuche sehr gärn wieder für üch da und freue mich sehr uf üch. 

Folgendi Massnahme müend bimene Shooting mit Persone bis uf wiiters nu ighalte wärde: 

• Ich wirde es Shootings mit höchtens 4 Persone chönne durefüehre.
• Die 4 Persone müend im gliiche Hushalt läbe (ussert ier wend nur Bilder, wo ier mindestens 2 Meter Abstand hend:-)).
• Bi Shootings verusse wird de verlangti Abstand vo mier zu üch (und bitte au umgekehrt) ghalte.
• Da bi Babyshootings de Abstand nid chan ighalte wärde, wird ich en Maske träge und natürlich mini Händ regelmässig wäsche/desinfiziere.
• Falls ier (oder ich) Symptom hend, wird s Shooting verschobe.

Ich bin ja so gspannt, wie de nüüi „normali“ Alltag für die nächsti Ziit wird wärde und wür mich so freue, es paar Glücksmoment mit minere Kamera für üch feschtzhaltä.